مطبخ البلد
طريقة السمك المشوي بالردة بالبيت
طريقة السمك المشوي بالردة بالبيت
المقادير :
- هنحتاج اى نوع سمك تحبوه بلطى او بورى او حتى السمك اللى شبه السردين بس اكبر منه
- كمية السمك حسب عدد الافراد
- ربع كيلو ردة مش هنستخدمها كلها لان وزنها خفيف جدا
لدقة السمك او التتبيلة اللى هنرشها عليه بعد ما يطلع
- راس توم مقشرة
- 2فلفل اخضر حار او بارد
- ملعقة كبيرة كمون
- ملعقة كبيرة كسبرة ناشفة
- ملعقة صغيرة شطة اختيارى
- عصير2ليمونة
- ملح
- 2طماطم مغسولة
- 2ملعقة كبيرة زيت
- رشة بقدونس وحلقات لمون للتقديم
الطريقة
- هنغسل السمك كويس ونفتح الخياشيم بايدنا وننضفها بالمية كويس
- فى ناس بتحب تنضف البطن وتحشيه بصل وتوم وفلفل وكمون وملح زى ما تحبو او تسيبوه مقفول
- بعد ما غسلنا السمك بنعصر عليه لمونة ونضعه فى الردة نغلفه بيها كويس اوى
- نحضر شواية اى نوع فى ناس زمان كانو بيشو على صينية خفيفة قبل الشواية اللى عندك ينفع نسخن الشواية كويس اوى اوى ونرش رشة ملح خشن عليها هيساعد ان السمك لا يلتصق متنسوش لازم الشواية تكون سخنة جدا
- نضع السمك اللى تبلناه بالردة نرص على اد حجم الشواية ويفضل الا يلتصق ببعضه لسهولة تقليبه
- طبعا هنستنى حوالى دقيقتين قبل ما نخلى النار متوسطة يعنى لازم اول دقيقتين النار تبقى عالية والشواية سخنة عشان السمك ياخد صدمة الشوى على نار عالية لو سمك بورى او سمك بلطى كبير هنخلى بالنا عشان يستوى كويس من جوة اننا نهدى النار الى متوسطة بعد اول دقيقتين
- اول ما نلاقى الوجه اصبح لونه غامق نقلبه على الوجه الاخر
- لو سمك بورى كبير هنهدى النار بعد اول دقيقتين خالص عشان السمك الكبير بياخد وقت ونضغط عليه من وقت للتانى بالملعقة عشان ينزل السوائل ويستوى بالنسبة للسمك البورى الكبير
- ونتركه يتشوى براحته وممكن نفتح واحد قبل ان نشيلها من الشواية عشان نعرف استوت ولا لاء ونعرف مدة السوا اد ايه لانها يختلف من شواية لاخرى
المصدر
